Senteda generala dla SVI: Olivia Schubert (FUEN): I derc dles mendranzes ne dess nia depene dal clima politich
La presidenta dla FUEN Olivia Schubert rejona pro la senteda generala dl SVI
La presidenta dla FUEN, Olivia Schubert, à dit te si descurs pro la senteda dl SVI da speré che l contest geopolitich ne vegne nia piec y ch'al ne vegnee nia enjonté d'autres crises a les truepes bele latentes, daviache te temps de crisa à i politics na gran tendenza da se conzentré sun les chestions che reverda les mendranzes dal pont de veduda dla segurté, plutost che na chestion fondamentala di derc dla porsona. Te de teles periodes vegn sovenc ence i derc linguistics metus en discuscion tl inom dla unité nazionala. I messon giaté respostes univoches a dut chest, à dit Schubert. Ala à damané che la Comiscion Europeica istituesces n pont de contat istituzional per les mendranzes nazionales dl'Europa. Les narazions populistes mess gní contrastedes con i fac. Daviache l'UE ne se dá nia ju con les chestions che reverda les mendranzes, dess les mendranzes europeiches colaboré deplù con les Nazions Unides y l Consei dl'Europa per cherié y renforzé i mecanisms de protezion giuridica.
L fat che l'iniziativa Minority SafePack ne é nia vegnuda azeteda n'é nia na perduda, ma demé n vare endô, à sotrissé Schubert. "La dezijion dla Comiscion ne pó nia straiché la rei de solidarieté che i on costruí", à dit inant la presidenta dla FUEN, assiguran che i obietifs y les mesures dedes dant tla iniziativa vegnirá portés inant con d'autri mesi. Per chest fin conta la FUEN dassen sun l sostegn dl Südtirol.
La FUEN à podù se lascé sun l Südtirol ence tl passé, à sotrissé Schubert, fajon referiment a la seria longia de presidenc y vizepresidenc sudtirolesc tla storia dla FUEN. Ala à rengrazié en particolar Christoph Pan, per trueps agn diretour scientifich dl Istitut per i grups etnics y president onorar dl SVI. Do la revoluzion dl 1989/90, per ejempl, àl metù a desposizion si gran savei y sia esperienza per la costituzion dl autogovern regional di todesc dl'Ungaria.